Yuz ochibsan misli g’uncha, tosh bo’lsin boshing sani,
Boshi ko’kka etdi bul kun barcha qardoshing sani,
So’zlarim tizdim qog’ozga, topmayin arzir bisot,
Yo falak, yulduzu – oy tegrangda yo’ldoshing sani.

Marvariddek, mitti jisming bunchalar nozik nihol,
Ikki chashmingni qo’riqlar birlashib bir juft hilol,
Yo malak topmish tavallo, o’rtagay ming bir khayol,
Bunchalar mohirmi yo, qudratli naqqoshing sani.

Shuncha tole kimda bordir bir o’zingga ming fido,
Tashnadek intiq kutilgan qaysi mashhur ibtido,
Allalaydi ko’hna ohang, to’lg’anib sirli navo,
Zinda bo’lsin to abad oy birla quyoshing sani.

Gul kabi oshufta o’sgin, oy kabi oydek sanam,
Dilginangda kuy yaralsin, qo’llaringda cho’g’ qalam,
Shu go’zallikni yaratgan, ko’rsatar qutlug’ karam,
Otashin baytu – g’azal bolg’usi sirdoshing sani.

Chiqmadim peshvoz yo’lingga men, farishtam ming uzr,
Senga deb terdim yurakdan toza saylab inju – dur,
Men Amira shu qasrda, lek hayotda ko’p faqir,
Ko’nglidan shohu, malika bu siyratdoshing sani.