 Бугун Минскда Демократ Кучларнинг Конгресси номи остида ҳамма мухолифат ташкилотлари вакилларининг йиғилиши бўлмоқда. Хабарларда айтилишича, у ерда 900 дан ошиқ делегат, 150 дан ортиқ меҳмон, фахрий меҳмон ва журналистлар бор. Конгресс залидаги кайфиятни Ташкилий комитет раиси Александр Бухваловнинг қуйидаги сўзлари билан ифодалаш мумкин: “Мен ҳукумат томонидан провокациялар кутмаяпмиз. Мен ўз ичимиздан чиқиши мумкин бўлган провокаторлардан хавотирдаман”. Ҳозирданоқ турли гуруҳлар ўртасида мухолифатнинг келажакка мўлжалланган стратегиясини белгилаб олишда жиддий қарама-қаршиликлар борлиги кўринмоқда. Бу табиий, чунки, Конгрессда демократлардан тортиб коммунист ва миллатчилар ҳамда турли радикалларгача бор. 2 йил аввалги Конгрессда Демократик кучлар Сиёсий Кенгашининг раисдоши қилиб сайланган ва ўтган йилги президент сайловида мухолифатнинг номзоди сифатида иштирок этган Александр Милинкевич бу сафар Сиёсий Кенгашга раисдош бўлиш ниятида эмаслигини, асосий диққатини ўзи раислик қиладиган “Ҳуррият учун” ҳаракатига бағишлаяжагини айтиб, аслида, ўзини бирлашмадан четроққа олишга интилмоқда. Бошқа турли гуруҳлар ўртасида ҳам зиддиятлар кучли. - Бу каби йиғилишлар биз учун ҳам ўрнак бўлиши керак, - дейди “Бирлик” Партияси раиси Абдураҳим Пўлат. - Рус тилида бу каби анжуманларни ифодалаш учун “тусовка” сўзини ишлатишади. Шубҳам йўқки, тусовкалар жуда ҳам керак бўлган тадбирлар, улар орқали турли гуруҳлар, энг камида, бир-бирларини ўрганиб борадилар, позицияларини яқинлаштириш устида ишлаш имкониятига эга бўладилар. Аммо, улардан катта реал сиёсий фойда кутиш қийин, айниқса, Ўзбекистон каби диктатура кучли бўлган мамлакатларда. Диктатура ва диктатуранинг доимий провокациялари остида бирлашабилиш учун, бир томондан, лидерларда катта сиёсий ирода, иккинчи томондан, ўз лидерларига таъсир кўрсатоладиган сиёсий партиялар, қолаверса, фуқаролик жамияти бўлиши керак. 2003 йилда “Давра Кенгаши”нинг тузилиши ва ундан кейинги жараёнлар кўрсатдики, бизда бу факторларнинг иккаласи ҳам йўқ. Шу сабабли, меннинг аввалги позициям тўғри бўлганлигига ишончим яна ҳам ортмоқда. Мухолифат мавжуд энг кучли ташкилот атрофида бирлашиши керак. Мен “Қайси ташкилот энг кучлидир?” деган савол устида ҳамма билан биргаликда жавоб қидиришга тайёрман. Аммо, ўйлайманки, ҳақиқатда бирлашишни истаган кучлар бу савол устида ўйлашга бошласалар, жавоб - “Бирлик” Партияси бўлади. Демак, "Давра Кенгаши" шу ёки бошқа ном остида ва "Бирлик" атрофида тикланиши керак.
Manba:«HARAKAT» XABAR AGENTLIGI.
|