Президент Буш илк бор Ўзбекистонни танқид қилди
2001 йилдан бери стратегик ҳамкор деб билинган ва фақат Андижон воқеаларидан кейингина Давлат Департаменти даражасида танқид қилинган Ўзбекистонни президент Бушнинг ўзи биринчи марта нодемократик давлатлар қаторида тилга олди. У Ўзбекистон эришилган эркинликлардан чекинди деди. Буш эркинликлар дер экан Ўзбекистон ва АҚШ ҳамкорлиги йилларида қисман бўлсада амалга оширилган ёки Ғарбни усталик билан чалғитилган ҳисоботларни назарда тутган бўлиши мумкин.
Бу гап Прагада “Демократия ва хавфсизлик” анжуманида, жуда катта халқаро платформада айтилгани муҳимдир.
Бу шунинг учун муҳимки, АҚШ маъмурияти Ислом Каримов ҳукуматини ислом ниқоби остидаги террористик гуруҳларга қарши курашда ягона сиёсий куч деб ҳособлаб, унга нисбатан кескин гаплар айтишдан, кескин чоралар кўришдан тийилиб келаётганди. Ҳатто унинг АҚШ ҳарбий базасини олиб чиқиш ҳақидаги талабини ҳам бажарган эди. Аммо бугунга келиб, Ўзбек жамиятида хуружларга қарши чиқа оладиган бошқа кучлар ҳам борлиги яққол кўзга ташланмоқда. Бу Ислом Каримовдан кейин мазкур ўлканинг келажаги хавф остида қолиши мумкин деган иддаоларга жавоб бўлмоқда.
Энг асосийси Ўзбекистон нодемократик давлат эканлиги АҚШ президенти даражасида илк бор очиқ эътироф этилди ва бу дунёнинг сиёсатини белгилашда катта ўринга эга бўлган давлатнинг ташқи сиёсатида ўзгаришдан даракдир. Бунда ўзбек демократик мухолифати намояндаларининг ҳукумат идоралари мулозимлари билан бевосита учрашувлари, АҚШ Конгрессига йўллаб турилган ҳужжатлар ва Буш номига ёзилган хатларининг ҳам ўрни йўқ эмас.
Биргина Демократик Ўзбекистон Конгресси сенаторлар, конгрессменлар ва ҳукумат раҳбарлари номига ўнлаб мурожаатлар билан чиқди. Лекин бу уммондан зарра. Энди ҳамммиз бир бўлиб, Ўзбекистоннни АҚШ ташқи сиёсатида биринчи галдаги муҳим давлатлар рўйхатига киритиш борасида фаолият кўрсатмоқ лозим. Бу эса, Ўзбекистонни Россия қарамлигидан қутқазиш , демократик давлатга айлантириш учун жуда муҳимдир.
Дунёдаги демократик давлатлар йўлбошчиси бўлган мамлакат раҳбарининг номидан Ўзбекистон режими танқид қилинишини бу йўлдаги биринчи қадам деб қарамоқ керак.

ТАҲРИРИЯТДАН׃ Президент Буш׃
-Шимолий Корея,
-Судан,
-Зимбабве,
-Эрон
-Сурияни дунёдаги энг ёмон диктатуралар,
-Венесуэла,
-Ўзбекистон,
-Вьетнамни эришилган эркинликлардан ортга қайтган дея танқид қилди.