 Бишкекдаги ўзбек қочқинлари жамоаси янги ҳафталик газета чиқаришга бошладилар, деб хабар беради ўша ерлик мухбиримиз. 25 майдан бошлаб, шу кунгача унинг 2 сони чиқди. "Ҳижрат Сарбони" номли бу газетани тайёрлаш ишларига Бош муҳаррир Анвар Сорбон раҳбарлик қилмоқда. Таҳририятда “Бирлик” фаоллари Холдор Вулқон ва Улуғбек Бекиров ҳам бор. Бундай газета чиқариш ташаббуси Анвар Сорбондан чиққан. У ва унинг атрофидаги фидокорларнинг мақсади - Қирғизистонда тобора кўпайиб бораётган ўзбек қочқинларига хизмат қилиш, уларнинг кўпчилиги интернетга киришга имкониятлари йўқлигини ҳисобга олган ҳолда, қоғозда газета чикариб, уларга турли янгиликларни етказишдир. “Газетани ҳозирча ҳеч қандай маблағсиз, текин ресурс марказларида бир амаллаб фойдаланиб, унга ялиниб, бунга ялиниб, эплаб чиқаряпмиз” дейишади фидикорлар. А4 форматдаги қоғозда 16 саҳифада чиқарилаётган газетанинг икки сони етарлича қизиқарли материалларни ўз ичига олган. У ерда ўзбек демократик мухолифатининг сайтидан олинган бир қатор мақолалар, ёзувчи Холдор Вулқоннинг “Ҳаракат” журналида ҳам эълон қилинаётган “Олисларда ёнган чироқлар” қиссасидан парчалар, Улуғбек Бекировнинг шеърлари ва таҳририёт аъзоларининг мақолалари бор. “Ҳаракат” сайтининг маъмурияти ҳаммага мурожаат қилиб, Бишкедаги фидокорларга молиявий ёрдам бериш масаласини ўйлаб кўришга чақиради. Миллат ўз фарзандларининг миллат учун фойдали ташаббусларини қўллаб-қувватласагина миллатдир. Келинг, миллатлигимизни кўрсатайлик. www.harakat.net
|