Яхши ният қилсангиз ҳам,ёмон ният қилсангиз ҳам фаришталар омин айтадилар,деган гапни кўп бор эшитганман. Шу боис иложи борича яхши гаплар,чиройли сўзлар,ёқимли хабарлар билан инсонлар кўнглини ранжитмасликка ҳаракат қиламиз. Аммо афсуски ҳамма вақт бунинг уддасидан чиқиб бўлмайди. Чунки миллатинг боши узра балоларни ёғдириб турган кимсага қараб туриб,қандайин яхшисўз айта оласан?Ноҳақлик шундоққина болтасини дўстинг бошида қайраб турганини кўра билиб туриб, қандайин яхши сўз айта оласан? Бизнинг миллатда "отангни ўлдирганга онангни бер" қабилидаги менга ғоят ёқмайдиган бир нақл бор. Бу нақлни кўпчилик миллатдошлар эшитишган ёҳуд билишади,балки ноҳақликка дуч келганда такрорлаб ҳам қўйишади.Бу қанчалик тўғри? Бугун назаримда шу нақлга кўпчилик миллатдошлар оғишмай амал қилишаётгандай туюлмоқда. Чунки ҳақни сўзлаган фарзандни "оқ" қилиб юборганлар ўша юқорида айтганим нақлдан келиб чиқиб шундай қилишаётганмикан? Албатта мен тушунаман, бошингда зулм қиличини ялонғочлаб турса бошқа фарзандалар омонлигини ўйлаб, яна ўша ўзимизнинг миллат нақлларидаги "яхши гап билан илон инидан чиқади",дегандай йўл тутаётгандирлар. Лекин ҳар бир нарсанинг чек-чегараси бўларди шекилли.Ё ундай эмасми?Бугун Ўзбекистонда зулм чек-чегара билмай борган сайин кучайиб бораётгани, ўша "отангни ўлдирганга онангни бер" қабилида ўзини ўзи юпатувчилар кўпайганидан эмасмикан? Ҳаммаси Оллоҳнинг иродаси,деймиз.Тўғри ҳаммаси Оллоҳнинг иродаси,бироқ Оллоҳнинг иродаси,дея мутелик Оллоҳнинг унга эмас ўзини фиръавн даражасида кўраётганга итоатдан қаҳру ғазабини қўзғатмаётганмикан?