Эшитишимча баъзи кимсалар ёзишаётганмиш:
«Юсуф Жума ўғли қамалса пикет бошлади, нега бошқа қамалганлар учун пикет қилмайди. Нега бошқалар учун майдонга чиқмайди?!»
Оқилона савол, оқилона гина, оқилона маломат!
Тўғри мен оилам билан жаллод Ислом Карим истеъфосини сўраб, ойлаб ПИКЕТ
қилганман. Мамадали Маҳмудов, бир оз муддатга қамалган Бобур
Маҳмудовлар озодлигини сўраб пикет қилганмиз.
Таъначи жаноблар тўғри таъна қилишагн: афсуски, мен ҳар бир қамалган инсон учун пикет қилмадим. Айбимни бўйнимга оламан.
Таъначи жаноблар!
Балки Ўзбекистонда инингиздадирсиз, хотиржамлигингизни бузманглар, айбимни юваман.
Ёши ҳали қирққа ҳам етмаган тоғдек йигитни Каримов миршаблари
миршабхонада уриб ўлдирдилар. Ун ишлаб чиқарадиган корхонада қаровуллик
қиладиган акасидан сўрадим:
-Укангизни А.Сафаров бошчилигида миршаблар уриб ўлдирган, мен фақат Азизни биламан. Қолганлари кимлар сиз яхши биласиз айтинг.
-Қўйинг ака, эсимдан чиққан. Отам билардилар отам ҳам унутганлар.
-Наҳот ўғлининг қотилларини ҳам унитадими ота?!
-Энди мен шу ерда ишлаб турибман…
-Тушунарли…
Қоровул ишда пайти унга бир қоп кепак тегади. Бир қоп кепак. Ака укани бир қоп кепакка сотаяпди, мана халқ!
Таъначи жаноблар!
Яна таъна қиласиз: Қанақа халқ, битта кепакчи бутун халқ бўладими?!
Тўғри битта кепакчи бутун халқ эмас, бироқ мен нечта шундайларни
ўрганган бўлсам, бари бир гўр. Кимдир икки юз минг, кимдир бир ярим
миллион, энг кўп олгани беш миллион пул олишган. Қотиллар билан
савдолашган.
-Ўлса ўлиб кетмайдими? Сиз бир ўзинггиз, қотиллар бутун бир давлат, -деди менга бир ичи куйган.
-Ҳақсиз қотилни жазолата олмайман, бироқ уларга қарши курашсам қотилликлар камроқ содир бўлади, дедим.
-Тўғри, -деди, йигит, ҳар ҳолда ҳайиқишади.
Таъначи Жаноблар!
Фарзандлари ўлдирилса ҳам хотиржам яшаш халқнинг бурчи, қотилларга қарши кураш менинг бурчим.
Хотиржам бўлинг албатта курашаман, Пикет қилиш керак экан пикет
қиламан. Сизлар эса бетиним таъна ёғдириб туринг. Маломат қилиб туринг
мен ҳушёр тортаман, гуноҳларимни англайман.
Шеър ёзолмай қолган қаҳрамону, модерн шоирлар учун, хотиржам яшаётган шоирлар учун шеърлар ёзаман.
Бу менинг бурчим.
Хотиржам беш вақт номоз ўқиётган асл диндорлар ўлдирилса, шаҳидларга
таъна тошларини отган, бир оғиз ҳам ҳақни ўн йиллаб айтмай келаётган
номозхонлар учун ҳақни айтаман.
Бу менинг бурчим!
Бесаноқ фарзандлари қамалса ҳам, отилса ҳам инидан чиқмаётганлар ўрнига пикетлар қиламан, тинч инқилоб қиламан.
Бу менинг бурчим!
Ҳурматли таъначи жаноблар!
Хотиржам яшанглар, ҳатто тунлари ҳам безовта бўлманглар, хуррак отиб
тинчигина ухланглар. Ширин тушлар кўринглар, сизларнинг тунги
ишларингизни ҳам ўзим бажараман.
Бу менинг бурчим!
Хайрли тун таъначи жаноблар…..
