Бир бўстон яшнайди қўйнимда менинг
Гул эдинг ўзингни ўтга ташладинг,
Бўй қадрин билмаган итга ташладинг.
Садоқатсиз элдан авло содиқ сак
Кечирсин аҳли сак қуртга ташладинг.
Дод, дедим: жон қизим, бу халқда эр йўқ,
Бор дея қуёшни дудга ташладинг.
Ғаддор қавмдан ҳам чиқарми йўлдош,
Лахта юрагимни битга ташладинг.
Нечун қурум суртдинг манглайинга, оҳ,
Қон Юсуфни ўчмас ўтга ташладинг.
XXX
Бевафони севасан деб ёр, ўкинмагин зинҳор
Муҳаббатга муносибдир фақатгина вафодор.
Ўтру келган жононага дилни этмасман тортиқ,
Фақат сенсан жоним билан икки жаҳондан ортиқ.
Шакардайин оппоғимсан, шакардайин шириним
Кеча кундуз пойларингга интилурман бетиним.
Бевафони севасан деб, ёр, ўкинмагин зинҳор
Муҳаббатга муносибдир фақатгина вафодор.
XXX
Бир бўстон ётибди қўйнимда менинг
Оппоқ атиргули бўйнимда менинг.
Бўрондаги кема каби чайқалур
Ишқидан тошқин дил хунимда менинг.
Дафъатан очилур қизил гуллари
Висол деб аталган динимда менинг.
Кўзимда ўзингсан, ичимда ўзинг.
Мен йўқ, фақат сен бор менимда менинг.
Юсуфнинг шароби бўстон бўйлари,
Бир бўстон яшнайди қўйнимда менинг.
XXX
Бу халқ нон емайди, бу халқ емас ош
Фақатгина тош ер, фақатгина тош.
Емас мева берсанг, емас бол берсанг
Ер фақат санг берсанг, фақатгина санг.
Тошнинг ҳам тиллою кумушин емас
Фақат битта тошдан бошқасин демас.
Ул тошни бермасанг очликдан нурар,
Менинг тош бошимнинг тошини сўрар.
XXX
Магар ёниб турса печкада ўтин,
Мўридан ўтиннинг иси чиқади.
Гар исириқ ёнса дил яйрар мамнун
Кўмир-чи, инсонни ҳиди йиқади.
Халқ печка олови, шоҳ мўри дуди,
Бир бирига мос, одилдир фалак.
Димоғни булғаса мўрининг ҳиди
Демак ёнаяпти печкада тезак.
Ҳазил
Не-не гўшаларга қўясан қадам,
Гоҳ чўлда, гоҳ тоғда оласан ҳордиқ.
Уйни соғинасан кўкда бўлсанг ҳам
Ўз уйинг жаҳондан, жаннатдан ортиқ.
Лолазорли қирдан руҳинг олар завқ,
Поёнсиз саҳронинг завқи бўлакдир.
Завқли яратгандир бор мавони ҳақ,
Лекин фақат уйинг сенга юракдир.
Кўз яйрар, эҳтимол, қай бир бўстондан
Лек барча «ўз уйим—аршим » дедилар.
Магар имкон бўлса шаксиз ризвондан
Одамлар уйига қайтар эдилар.
Ёрим, юрагингда нечун қадоқлар,
Наҳот ўзгалардан яшнаса рўйим.
Дилбар гўшаларга ўхшар дилбарлар,
Сен-чи, сен дунёда ягона уйим.
