ЭНГ СЎНГГИ УМИД ҲАМ ЎЛМАСИН!

2007 йил сайлови муносабати билан Демократик Ўзбекистон Конгресси
Бошқарув ҳайъатининг МУРОЖААТИ

Демократик Ўзбекистон Конгресси 2006 йил, 27 Декабрда эълон қилинган
БУГУНГИ ВАЗИЯТДАН ЧИҚИШНИНГ УЧ БОСҚИЧЛИ ЙЎЛИ деб номланган мурожаатида Ўзбекистонда президентлик сайлови олдидан нима қилиш мумкинлиги ҳақида ўз таклифларини ўртага қўйган эди.

Мурожаат охирида׃

“Бу Ўзбек мухолифати учун сўнгги ҳал қилувчи имкониятдир. Бу имконият ҳам бой берилса, кейинги сайлов ҳақида гапиришни етти йил кутиш керак. Етти йилдан кейин бошқа етти йилни. Чунки бугун бир нарса қила олмаган куч эртага ҳам ҳеч нарса қила олмайди”- дейилганди.

Минг афсуслар бўлсинки, вазият шунга яқинлашмоқда. Ҳатто диктаторнинг ҳар қандай мухолифи ҳам Ислом Каримов яна етти йилга ҳокимият теппасида қолишига шак-шубҳа қилмаётганини очиқ айтмоқда.

Умидсизлик ва тушкунлик руҳи бутун жамиятни қоплаб олди. Шундай пайтда биз ҳали ҳам умид ўлмаганини эслатишни ўз бурчимиз деб биламиз.

Демократик Ўзбекистон Конгресси икки йилдан бери ўзини диктатурага, Каримов режимига қарши деб билган кучлар мамлакат ичидан битта номзод билан чиқиши Ўзбекистонда сиёсий мухолифатни куч сифатида пайдо қилажагани урғулаб келди. Лекин турли сабаблар билан бунга эришишнинг иложи бўлмади.

Бугунги мағлубият тушкунлиги балки ана шу сабаблардан устун келар? Шу муносабат билан биз икки таклифни ўртага қўймоқчимиз.

1.Биз таъкидлаб келаётган имкониятни ҳали ҳам амалга ошириш мумкин. Ҳали ҳам бутун мухолиф кучлар келишиб, мамлакат ичидан битта номзод чиқариш имкониятига эга. Бу номзод қайси бир ҳаракат, гуруҳ ёки партияга мансублигидан қатъий назар сайловда қатнаша олса, бас, уни қўллайлик.

Мухолиф кучлар тезликда Сайлов блоки тузишлари ва ким номзод бўлишини белгилаб олишлари лозим. Биз хориждагилар эса, декабрга қадар барча гина-кудратлар, низолар, ўзаро жанжалларни четга қўйиб, ана шу номзод атрофида жипслашайлик.

2. Агар ҳамма бундай номзод йўқ ва сайловда қатнашиш имконияти ҳам йўқ деган қатъий фикрга келса, у ҳолда ҳамма бир овоздан бу сайловни Байкот этиши керак. Ўшандагина дунёнинг диққатини тортиш мумкин. Лекин бугунги каби тарқоқлик Каримовнинг фойдасигадир.

Келинглар, аросатда қолмайлик, шу икки йўлдан биттасини танлайлик.

Бошқа йўллар бўлса, уни ҳам эшитишга тайёрмиз!

ДЕМОКРАТИК ЎЗБЕКИСТОН КОНГРЕССИ БОШҚАРУВ ҲАЙЪАТИ.

7 Октябр, 2007.

XXXX

ENG SO’NGGI UMID HAM O’LMASIN!

2007 yil saylovi munosabati bilan Demokratik O’zbekiston Kongressi
Boshqaruv hay’atining MUROJAATI

Demokratik O’zbekiston Kongressi 2006 yil, 27 Dekabrda e’lon qilingan
BUGUNGI VAZIYaTDAN ChIQIShNING UCh BOSQIChLI YO’LI deb nomlangan murojaatida O’zbekistonda prezidentlik saylovi oldidan nima qilish mumkinligi haqida o’z takliflarini o’rtaga qo’ygan edi.

Murojaat oxirida׃

“Bu O’zbek muxolifati uchun so’nggi hal qiluvchi imkoniyatdir. Bu imkoniyat ham boy berilsa, keyingi saylov haqida gapirishni etti yil kutish kerak. Etti yildan keyin boshqa etti yilni. Chunki bugun bir narsa qila olmagan kuch ertaga ham hech narsa qila olmaydi”- deyilgandi.

Ming afsuslar bo’lsinki, vaziyat shunga yaqinlashmoqda. Hatto diktatorning har qanday muxolifi ham Islom Karimov yana etti yilga hokimiyat teppasida qolishiga shak-shubha qilmayotganini ochiq aytmoqda.

Umidsizlik va tushkunlik ruhi butun jamiyatni qoplab oldi. Shunday paytda biz hali ham umid o’lmaganini eslatishni o’z burchimiz deb bilamiz.

Demokratik O’zbekiston Kongressi ikki yildan beri o’zini diktaturaga, Karimov rejimiga qarshi deb bilgan kuchlar mamlakat ichidan bitta nomzod bilan chiqishi O’zbekistonda siyosiy muxolifatni kuch sifatida paydo qilajagani urg’ulab keldi. Lekin turli sabablar bilan bunga erishishning iloji bo’lmadi.

Bugungi mag’lubiyat tushkunligi balki ana shu sabablardan ustun kelar? Shu munosabat bilan biz ikki taklifni o’rtaga qo’ymoqchimiz.

1.Biz ta’kidlab kelayotgan imkoniyatni hali ham amalga oshirish mumkin. Hali ham butun muxolif kuchlar kelishib, mamlakat ichidan bitta nomzod chiqarish imkoniyatiga ega. Bu nomzod qaysi bir harakat, guruh yoki partiyaga mansubligidan qat’iy nazar saylovda qatnasha olsa, bas, uni qo’llaylik.

Muxolif kuchlar tezlikda Saylov bloki tuzishlari va kim nomzod bo’lishini belgilab olishlari lozim. Biz xorijdagilar esa, dekabrga qadar barcha gina-kudratlar, nizolar, o’zaro janjallarni chetga qo’yib, ana shu nomzod atrofida jipslashaylik.

2. Agar hamma bunday nomzod yo’q va saylovda qatnashish imkoniyati ham yo’q degan qat’iy fikrga kelsa, u holda hamma bir ovozdan bu saylovni Baykot etishi kerak. O’shandagina dunyoning diqqatini tortish mumkin. Lekin bugungi kabi tarqoqlik Karimovning foydasigadir.

Kelinglar, arosatda qolmaylik, shu ikki yo’ldan bittasini tanlaylik.

Boshqa yo’llar bo’lsa, uni ham eshitishga tayyormiz!

DEMOKRATIK O’ZBEKISTON KONGRESSI BOShQARUV HAY’ATI.