Яқинда мусофирчиликда юриб,тасодифан бир ўзбекистонлик  йигит билан учрашиб қолдим.Салом-алик қилиб танишгандан сўнг,болалардан нечта деб сўрадим.Йигит бироз ўнғайсизланиб,ҳали уйланганим йўқ деб жавоб берди.Ёши 30 га кирибди,йўқчилик боис уйли-жойли қилишга ота-онасини қурби етмагандан йигит ўзга юртларда мардикорлик қилиб юрибди.Ишлаб,пул йиғиб,кейин уйланаман дейди.

Илгарилари ўғлини ёши 20 дан ўтар-ўтмас ота-оналар: “Ўғлим,мана ёшинг ҳам фалонга борди,кел бошингни иккита қилиб қўяйлик,танлаганинг бўлса айт совчиликка борайлик,ахир халқ маломат қилади-я”-деб,ҳаракатга тушиб қолишарди.

Аксарият йигитлар 20-23 ёшлар орасида уйланишарди,ундан ўтиб уйланганлар жуда озчиликни ташкил қиларди.У даврларда ҳар бир оиланинг ўзига яраша даромади бўлиб,ўғлини уйлантириб қўйишга қурби етарди.Қишлоқ жойларида яшаган энг камбағал оиланинг ҳам кам деганда 5-6 та қўй-эчкиси ва бир-иккита сигири бўлган.

Иттифоқ парчаланиб,Ўзбекистон мустақилликка эришгач “буюк келажак ижодкорлари”нинг мамлакатимизда олиб бораётган “оқилона” иқтисодий сиёсатлари шарофати билан бугун юртимизда бўйдоқ йигитлар ва қари қизлар сони кўпайиб бормоқда.

Масалан менинг 23 ёшдан ўтган 5 нафар жияним уйланмаган, уйлантиришга ота-оналарининг қўли калталик қилади, бир томондан қалин тўлашга маблағ бўлмаса, иккинчи томондан уй-жой масаласи чатоқ, учинчидан тўй харажатларига кетадиган пулнинг ўзи йўқ.

Бировдан қарз кўтармоқчи бўлсанг, қарз берувчи ҳам йўқ, шундоғам зўрға рўзғорини тебратиб турган одамларда пул не қилсин. Битта-яримта бойроқ кишилардан қарз сўрасанг фоиз тўлаш ҳисобига беради. Ўз вақтида қарзни қайтаролмасанг тамом, бор-будингдан айриласан.

Қишлоғимизда 23-30 ёшдаги уйланмаган йигитлар 18 нафарни ташкил қилар экан, мамлакат бўйича эса нечталигини тасаввур қилаверинг. Минглаб Тоҳиру Зуҳролар, Фарҳоду Ширинлар йўқчилик боис  бир-бирларининг васлига етолмасдан изтироб чекиб, оҳ уриб юрибдилар, гўёки қўшиқларда куйланганидек ” Сен унда зор ўлдинг, мен бунда зор қолдим”.

Ахир ҳамма бўйдоқ қолаверса, болалар туғилмаса, унда биз “буюк келажак”ни кимлар учун қураяпмиз!

Эҳ,не кунларга қолдик-а?