Майли жонимни сўра,
Бағримдан қуруқ кетма.
Лекин мендан ҳеч қачон
Муҳаббат таъма этма.

Ишқнинг ўз эгаси бор,
Ўртанмагин зоридан.
Муҳаббат менинг эмас
Қалбим ихтиёрида.
24.06.07.

Нодон фарзандинг бўлса
Ҳаққу имонга қарши.
Бегумон ўз уйингдан
Душманнинг чоҳи яхши.

Ғаним дилингни тилса.
У тузлар тилигингни.
Ёв ашкингни, боланг-чи
Қуритар илигингни.

Дунё душманинг бўлса
Қочса бўлади. бироқ
Жоҳил фарзанддан сени
Қутқарар фақат тупроқ.

Тубан жигаринг бўлса
Ҳаққу ақлга қарши.
Ўз уйингдан ғанимнинг
Отган пайкони яхши.
24.06.07.

Оёғинг Каъбамдир, оёғинг Каъбам
Пойингдан айрилсам бахтиқораман.
Мен мўмин қолганлар кофири олам,
Ҳар зумда минг карра ҳажга бораман.

Оёғинг Каъбамдир, Каъбамдир пойинг
Йўлингнинг тупроғи бошимнинг тожи.
Мендан бошқа ҳожи йўқ, куним, ойим
Мен бутун оламда ягона ҳожи.
25.06.07