(Turonzamin).Ўзбек халқининг ёрқин юлдузи, миллий шоири Юсуф ЖУМА зиндонда экан, унинг ва ҳибсда бўлган ўғли Бобурнинг ҳимоясига отланган адвокат Руҳиддин Комиловга у билан учрашишга изн беришмаётган эди.

Жуда кўп уринишлардан сўнг адвокат орадан бир ярим ой вақт ўтиб илк бор Юсуф ЖУМА билан учрашди. Лекин у учрашув тафсилотини айтишга чўчимоқда.

Бизга маълум бўлишича, унга шоирга ўтказилган қийноқ ҳақида гапириш ман этилган. Ҳатто у шоирнинг ҳузуридан чиқаётганда уни ғайриқонуний равишда вақтинча ҳибсга олганлар.

Адвокатнинг қўлида шоирнинг ўз аҳволидан шикояти битилган ёзув ҳамда унинг изтиробли шеърлари бўлган.

-Шеърларни мен олиб қўйдим,-деди бизнинг телефон мурожаатимизга жавоб берган Бухоро вилоят ИИБ масъул ходими Шукуров.- Улар менинг сейфимда турибди.

Унга шеърларни ўқидингизмики, мусодара қилдингиз, деган саволимизга “йўқ” жавобини олдик ва ажабланмадик. Чунки у шеърларни ўқишга қўрқади. Фақат у эмас, жуда кўп золим қалблилар ва ҳатто Ислом Каримов ҳам Юсуф ЖУМАнинг шеърларидан қўрқади. Акс тақдирда у зиндонда бўлармиди?