Ўша машъум кун асло ёдимдан чиқмайди. 1993 йил. 13 феврал куни. Саҳарлаб Ҳамид Олимжон майдонидаги кўп қаватли бинодаги уйимизнинг эшигини бузишди. Қишнинг қаҳратони. Ёмғир ёғиб турибди. Уйдаги нарсаларни ташқарига чиқариб отишди. Ухлаб ётган тўрт ёшли эгизакларни чинқиратиб ёмғир остига олиб чиқишар экан, қаердандир етиб келган Мўтабар Аҳмедова уларни бағрига босиб, қўшнилардан бирининг уйига олиб кирибди.

Бутун атрофда миршаблар ва қўлида овоз узатгичлари бўлган казо-казолар. Бу “амалиётга” уч киши раҳбарлик қилаётган эди. Олий Мажлисдан Эркин Халилов, шаҳар ҳокими Адҳам Фозилбеков, Мирзо Улуғбек тумани ҳокими Шавкат Мирзиёев…

Ҳар уччаласи билан ҳам бирга ишлаганмиз, шахсан танийман, юзма-юз келганда уччаласи ҳам “Жаҳонгир ака…” дерди. Ҳатто Фозилбековнинг ёши мендан анча катта бўлишига қарамай.

Ўша кун “Золимликни тўхтатинглар”, десам “Буйруқ теппадан” деб бармоқларини осмонга кўтаришарди.

Кейин ўргансам, мени кўчириб юборишса, “Самарқандда депутатликдан чақириб олиб, йўқотиш осон бўлади” деган таклиф Олий Мажлис президумида ўша кезда ҳайъат аъзоси бўлган Шавкат Мирзиёев ва Эркин Халилов томонидан кўтарилган экан. Мен раис ўринбосари бўлган Ошкоралик қўмитасининг раҳбари Эркин Воҳидов Президент ҳам қатнашган ўша ҳайъатда “Бир сўз айтишнинг иложи бўлмади, машина тескарисига юриб кетди, оқсоқолга ёқиш учун Халилов билан Мирзиёевнинг оташи баланд эди” деганди.

Дунёнинг ишлари қизиқ, мени кўчириб, уйимни тортиб олишган кун Мирзо Улуғбек туманида Туркистон ҳарбий округи генералларидан қолган котежлар тақсимоти бўлган. Кимлар олган денг׃ Эркин Халилов, Шавкат Мирзиёев, Адҳам Фозилбеков… Кўп ўтмай Адҳам Фозилбековдан тортиб олишди. Эркин Халилов эса… кеча Тошкентдаги танишимдан хат олдим.

“Сизнинг бошингизга солган кунни Оллоҳим Эркинннинг ўзига ҳам кўрсатди. Ёмонроқ қилиб кўрсатди. Уй-жойини булдозер билан бузишди” дейилганди мактубда… Аниқласам уйини эмас, бизнесс жойини бузишибди. Бу ҳам унинг хону мони-”уйи”! Аммо яшаб турган уйини ҳам тортиб олишаётган экан. Қайси бирини? Унинг Тошкентда бир эмас, беш уйи бор-ку?!

Лекин нима бўлганда ҳам қайтар дунё. Ҳали Шавкат Мирзиёевга ҳам навбат келади.. Унга ҳам Тангрим Шавкатнинг ўзи қозоннинг бир томонида туриб чўмич билан ковлаб пиширган “зулм шарбати”дан ичириши муқаррар.

Жаҳонгир Муҳаммад.

Манба:"Туронзамин".29 январ, 2008 йил.