Помидор инқилоби

Бугун Ўзбекистонда вазият ғоят таранглашади деган хабарлар қулоққа чалина бошлади. Нега десангиз ёшлар астойдил енг шимариб скайпе (Skype) қўзғолонига ҳозирлик кўра бошлашибди.

Уларнинг скайпе инқилоби етакчиси исми шарифини эълон қилмаслик шарти билан қуйидагиларни бизга маълум қилганди.

Ҳа, майли шартли равишда етакчи отини Помидор деб қўя қолайлик.Чунки улар Қирғизистон, Гуржистон , Украинадаги инқилобчилардан фарқли ўлароқ бошқа рангни танлашлари кераклигига келишиб олишган экан, яъни "Қизил инқилоб" деб.

Ҳатто ҳамма рамзлари ҳам қип-қизил экан. Кийимбошлари ҳам бошдан оёқ қип-қизил. Скайпе инқилобчиларининг йигитга ўхшаброқ кетадиган сал ғалатироқлари қизил духобадан иштон кийган, қиз деса қизболамас, ўғил деса ўғилболамасларининг бошида қизил дурра тақишга келишиб олишибди.

Хуллас, овозларидан таниб қолмасликлари учун оғизларига ҳам қизил латта боғлаб олишган, дейишади. Аммо ўзиям ёмон инқилоб бўлади шекилли-а, деб ҳамманинг бутун диққат-эътибори денг ўша ёқдайкан.

Скайп инқилобига қачондан буён ҳозирлик кўряпсизлар, деган мухбирларнинг саволига улар: "... бу инқилобий қизил сиркуя, лекин тахминан бир-икки йил бўлиб қолганини айтишимиз мумкин, холос. Скайп инқилобида ҳеч нарса очиқ-ошкор айтилмайди. Бу инқилоб кенгаши яширин ҳаракат олиб боради-да кейин бир кун бориб "поп" этиб помидор сингари пишиб узилади-да сувлари сирқиб ариқчалардан ўтиииб боради-дагин қизил денгизнинг шўр сувига омухта бўлиб кетади.

-Ҳа, тушунарли.Умуман ўзи инқилоб қандай бошланади?

-Аммо шу мухбир деганлари ҳам "жа" инжиқ халқ бўлади-да, бир нарсани сал шипшитини эшитиб қолса бўлди, ипидан-игнасигача билмагунча қўйишмайди-а.

Инқилобчилар скайп ортида ўтирганлари учун кўринишмайди. Камералар ёқилса бўлади-ю ундан инқилобчиларнинг чап оёғига қалин қилиб боғланган қизил латтадан таниб қолишади. Шунинг учун яширин бўлади бу инқилоб. Кейин аввал ҳам айтдим-ку, гап уқасизми ўзи, ҳамманинг оғзи ҳам қизил латта билан боғланган бўлади.

Мухбир тушмагур талмовсираб яна савол ташлайди.

-Оғиз қизил латта билан боғлиқ бўлса қандай гапиришасизлар?

-Буни инқилоб куни кўрасиз!!!!

-Инқилобингиз шиори қандай?

-Ўша куни ҳамма скайп инқилобчилари қўлларида биттадан помидор кўтариб келишади.Ана шу шиор.Бу дегани айтилмаса ҳам "Яшасин помидор инқилоби!" деган маънони англатади.

Инқилобга ҳар вилоятдан тахминан минг киши чақирилди... Лекин нима бўлдию Скайпга фақат икки киши боғланди.

Борига барака деб улар қандай қилиб Каримовни ағдаришни муҳокама қила бошладилар.

-Аввал эллик граммдан уриб олайлик, помидор билан, ўшанда калла яхши ишлайдида,-деди биттаси.

Шу билан инқилоб бошланиб кетибди ва бир пайт хотинлари кириб қарашса Каримовни ағдарамиз деганларнинг ўзлари ағдарилиб ётган эмиш…

Ризо Обид