Ўзбекистондагиларнинг уйида уни йўқлари билан ҳам, озми-кўпми дуруст тирикчилик қиладиганлари билан ҳам суҳбатлашаман. Қизиғи шундаки, қорни нонга тўймаётганлар қорни тўяётганларнинг қариндош-уруғи, жилла қурганда яқин қадрдонларидан. Лекин буниси унисига ўзидан ортиб камдан кам ҳолатдагина мурувват кўрсатиши мумкин.

Шунинг учун дардлари ҳам бўлак. Бугун баъзилари билан суҳбатлашдим. Қаранг улар нима дейишди?

Шарифбой:

-Катта анча эрий бошладилар, анча-бунча четдан кирадиган молларга бож нархи пасайди.

Солимбек:

- Катта Ўзбекистондан қишлоқ хўжалик маҳсулотларини чиқармаслик тўғрисида қарор чиқарди. Помидор кимга керак? Энди у далаларда сув бўлиб оқиб кетади.Бу дегани яна шўринг қургур деҳқоннинг шўрвасига шўр тўкилди дегани.

Азимбой:

-Одамларга ҳам ҳайронсан, нима деса лаққиллаб ишонаверади. Кеча чойхонада шу гап бўлди, нимаймиш катта яна Америка, кейин Европаминан қайта жўра бўлаётганмиш.Одам ҳам шунчалик содда бўладими-ей? Ҳамма шу гапга ишониб юрибди.

Суҳбатдошларнинг барчаси “катта” деганда фақат бир кишини назарда тутишаётгани аниқ. Лекин “катта деганингиз ким ” дея сўрасак, “Ғалати савол берасиз-а, тағин телефон-да!” деб қўйишди.

Худди ана шу жавобнинг ўзи Каттанинг эриб-эримаганига ҳам жавобдир. Шундай эмасми?

Ризо Обид