"Жафокаш онанинг фарёди, деб ёзинг ёҳуд энди биз нима қилайлик?"
Бир ойдирки менда ҳаловат йўқ.Бир ойдирки менинг тинчим йўқолган. Сабаби бир қарашда оддийгина, лекин менимча оддий эмас.Чунки ўша куни она, ўзбекнинг онаси йиғлаб телефон қўнғироғи қилди-да.
-Ассалому
алайкум! Мен Андижон фожеаларини ўз кўзим билан кўриб ва унда ким ҳақ,
ким ноҳақлигини ҳозирча айта олмайдиган жафокаш онаман.Мен
ичимдагиларни кимгадир айтмасам юрагим ёниб кетяпти.Бор ҳақиқатни
биламан, аммо айтолмайман.Чунки фарзандаларим тақдири қил устида
турибди.Менинг турмуш ўртоғим оддий косиб.Бизнинг сиёсату давлат
ишларига мутлақо даҳлимиз йўқ.Каримов келармиш, одамларнинг дардини
эшитаркан деб тасодифан майдонга чиқиб қолдик.Аслида анави ташкилотми,
гуруҳми дейилаётганнинг раҳбарига қизалоқлик пайтим қўшни
бўлганмиз.Унинг отаси шимининг ёнида қизил ҳошияси бор, ёнбошига
тўппонча осиб, бир нима ёзувлари бор мотоцикль миниб юрадиган одам эди. Балки
МВД, балки КГБ эди.Ҳарқалай у давлатнинг одами эди.Ўша гуруҳнинг
бошлиғи дейилаётганнинг сингиллари бор эди.Исмлари Кибриё, Зикриё.Биз
орт томондаги уларнинг қўшнилари эдик.Доим ўша қизчалар билан ўйнар
эдик.
Энди ўн учинчи май воқеаларини биров ундай, биров бундай
деяпти-ю, аслида нима бўлгандаям кўплаб бегуноҳ кишилар ўлди.Ҳа, мен
билган нарсаларимни айтолмаганимдан ичим қизийди.Илтимос сиз, жафокаш
онанинг фарёдалари деб ёзинг.Мен нима қилай?Мен иймон-эътиқодли аёлман,
лекин Европанинг тинч мамлакатларидан бирига холигина чиқиб олган
бўлсамда юрган-турганимда, еган-ичганимда ҳаловат йўқ.Чунки менинг
фарзандалрим у ёқда қолиб кетишди.
Аслида мен хўжайинимни излаб
кейин йўлга чиқиб, оилаларни бирлаштириш шарофати билан бу ёққа
келгандим.У пайт хўжайиним ҳақиқатан тириклигига ишониб-ишонмай бир
ҳолатда излаб чиққандим.Хайрият у тирик экан.Лекин анави қайтиб
кетаётганларни энди тушунаётгандай бўляпман.Биласизку ўзбек аёли учун
фарзанддан юқори мансаб ҳам мақсад ҳам йўқ.Ўзбекнинг онаси фозилку
фозил қотил боласини ҳам суяверади.
Менинг мўмин-қобил
фарзандаларим бор , оллоҳга шукур.Лекин биз ватандан чиқиб кетгач
уларнинг ҳам тинчи йўқолган.Аллақанақанги одамлар уйга келиб
"ота-оналаринг қайтиб келмаса, сенларнинг ҳолингга вой" дея қўрқита
бошлашган.Иложсиз қолган бечора болаларим ҳаммаёқни ташлаб
Қирғизистонга келишган.Мана бир йилдирки улар қўлларидаги қочоқ мақоми
ёзилган ҳужжат билан биз яшаётган мамлакатга кела олмай
юришибди.Улардан анча кейин шундай мақом олганлар эса аллақачон учинчи
мамлакатда бошпана топишди.Мен бундан хурсандман албатта.Лекин бизларни
УВКБ ООНдай нуфузли ташкилот вакиллари ҳам алдашди.Шундан мен ўйлаб
ўйимнинг охирига етолмаяпман.Наҳотки бутун дунёда сиёсат Каримовники
каби жирканч.Тоза ва шаффоф эмас.Чунки бир йил давомида
"ота-онангизнинг ёнига ана жўнатамиз, мана жўнатамиз" деб ҳануз
жўнатишгани йўқ.Мен эса бу ёқда уларнинг ҳолига ярай олмаётган она
сифатида ўзимни ўзим еб ётибман.Шу кунларда фақат таблеткалар билан
тирикман.Мен бу ҳолга чидамасдан бу дунёдан ўтиб кетсам дардимни
одамларга етказинг илтимос, илтимос...Майли бир йил алдашаганига ҳам
розиман.Лекин энди у ёқдагилар айтишибдики болаларимга:"ота-оналаринг
турган мамлакат қочоқлар қабул қилиш режасига кўра бу йилга қабул
қилмайди.Режа тўлган.Энди сенларни бошқа бир мамлакатга жўнатамиз"
дейишибди.Ахир мен фарзандаримдан тирик ҳолда ажраб қандай яшай
оламан?Мана ўзингиз айтингчи?...
Телефонда ўзбек онасининг дард
билан, кўзда ёшлар билан айтилган бу фарёдлари қуёш тафтидай
куйдирмоқда мени, юракнинг кафтидай ожиз ҳилпиратмоқда мени.Чунки мен
ҳаммасини қўя туринг, биргина ўзбек онасининг дардига дармон
бўлолмаяпман ва шунинг учун ҳам бир умр озодликка етиш армони билан
яшаб унга етолмаганим кейинги бир ойдирки янада оғриқли кечмоқда...
Бир ойдирки менда ҳаловат йўқ.Бир ойдирки менинг тинчим йўқолган.