Агар сиз қамамаган бўлсангиз - сиз чиқара биласиз

Ўзбекистон Республикаси Президенти Ислом Каримовга
Бухоро вилоят Қоракўл туманида яшовчи, ҳибсда сақланаётган шоир Юсуф Жумаевнинг 93 яшар онаси Жумаева Хурсандой томондан
Ариза

Mен тўқсон уч ёшдаман. Менинг ўғлим Юсуфжон ҳозирда қамоқда сақланмоқда. Мен ўғлимни кичик ёшлигиданоқ фақат ҳақиқатни айтадиган, ҳеч кимга ёмонлик қилмайдиган этиб тарбиялаганман.

У доимо ҳақиқатни айтар, қўлидан келганча мухтожларга ёрдам қиларди. Унинг ҳақ сўзидан дарғазаб бўлган кўплаб подшоларни кўрганман, лекин уларнинг ҳеч бири ўғлимни ўлдирмоқчи бўлмаган, уни ҳеч ким қаматмаган.

Доим Бухородаги катта катта амалдагилар ўғлимга ҳақиқатни айтгани учун зулм қилса юқоридаги подшоларнинг ўзи зулмни тўхтатарди. Сизнинг даврингизга келиб ўғлим икки маротаба қамалди, мен ўғлимни озод қилинглар ҳеч кимга ёмонлик қилмаган деб кўп идораларга бордим, ҳаммаси ўғлингизни фақат Пошшо чиқаради деб сизни айтишяпти.

Ўғлимнинг уйида бир набирам, бир набира келиним ва учта чеварам билан ўғлимнинг йўлига интизор бўлиб ўтирибмиз. Мен тинимсиз ўғлимга ёмонлик қилаётганларга Оллоҳ инсоф берсин! Инсофга келмайдиганларининг жазосини берсин деб, Оллоҳдан сўраяпман. Уйимизнинг атрофида кечалари билан ўғри каззоблар юриб чиқишади, уларнинг айримларида милиция формалари бор.

Ўғлимнинг қамалишига Сизни буйруқ беришган дейишяпти, мен бу сўзларга ишонмайман. Ўғлим Юсуфжонни агар сиз қамамаган бўлсангиз, Сиз чиқара биласиз, илтимос ўғлимни чиқариб беринг!

Ўғлимни озод қиласиз деб Сиздан умидвор бўлиб, 93 ёшли мазлум кампир
Жумаева Хурсандой.

Эслатма׃ Хатни бувим айтиб, мен-неваралари ёзиб олдим. Рамазон кунлари бўлгани учун юмшоқ ёзишни сўрадилар.