Каримов жаллодларига бизнинг 2007 йилнинг 10 декабрида ўтказган пикетимизга қарши видео кассета тайёрлатиб, хорижий дипломатлар ва элчихона вакилларига кўрсатаётган ва тарқатаётган экан. Бу қалбаки видео кассета ҳақидаги хабарни эшитишим билан 2007 йил 10 декабрь куни кўрганларимни қоғозга туширишга қарор қилдим.

2007 йил 10 декабрь куни биз декабрь ойида бошлаган пикетларимизнинг давом килдириш мақсадида Қоракўл шахрига дадамга тегишли бўлган 20 О 2302 машинасида йўлга чиқдик.

Бугунги пикетда биз Бухоро вилоятининг учта туманини машинада “Каримов кет” деган шиорлар билан айланиб чиқишни режалаштирган эдик.

Машинада дадам Юсуф Жумаев, акам Бобур Юсуфжон ўғли ва мен бор эдим. Биз қишлоқдан чиқишимиз билан бизнинг машина ортидан икита “Нексиа” машинаси кузатувни бошлади. Дадам ҳар куни битта машина кузатар эди, букун иккита булибди, сайлов олдидан бизга назоратни кучайтирибди, эътибор берманглар, деб айтдилар ва биз шахар томонга қараб жўнаб кетдик.

Бугунги пикет олдинги пикетлардан фарқ қилиб, биз машинага плакатларимизни ёпиштириб олиб, кўча юриши қилдик. Плакатларимзда «Диктатор Каримов, истеъфо бер, кет» деган шиор ёзилган эди. Биз пикетни аҳоли гавжум бўлган Қоракўл туман деҳқон бозори ҳудудидан бошладик. Аҳоли камроқ жойларда улар бизга индашмади.

Кейин Қоракўл туман Автошоҳбекати олдига келиб машинада тўхтадик, чунки бу ер ҳам Қоракўл шахридаги одам энг гавжум бўладиган жойлардан бири эди.

Акам Бобур машинани секин юритди, дадам шофёрнинг ёнидаги ўриндиқда эди, мен машинадан тушиб ҳаракатни видеога олиб бошладим.

Шу пайт орқадан етиб келган 20 0 7747 номерли оқ “Нексиа” машинасидан ИИБ ва МХХ ходимлари тушиб мени калтаклай бошлашди, қўлимдаги видеога олиш учун қулай N90 телефонини тортиб олдилар, фотоапаратга ёпишдилар.

Мен фотоапаратни уларга бермасдан ерга урдим ва синдириб ташладим. Улар менинг қўлларимни тишлаб ташлаган эдилар. Дадам мени уларнинг орасидан зўрға ажратиб олдилар, жаллодларнинг қолган қисми эса машинадаги плакатларни ва уйдирма айб билан ҳибсга олинган акам Машрабни гаровга чиқариш учун Қоракўл ИИБ бошлиғи Усмон Халимов айтган гаров пулининг бир қисми бор эди, ўшаларни олиб жўнаб кетдилар.

Акам Бобур ўзининг телефони билан бу вокеаларни видеога олиб турди. Улар хеч кандай санкция ва ёки бошка хужжат кўрсатмасдан машинамизни талаётган эдилар.

Биз яшириб қўйилган иккинчи плакатни олиб, Қоракўл туман Кимё таъминоти идораси олдига келиб тўхтадик.

Бу ерда машинамиз бир неча дакика тўхтади.

Шу вактда 20 G 9004 ва 20 O 77 47 “Нексиа” русумли икита ок ва номери эсимда йўқ, бита қизил машина келиб тўхтади. Улар яна бизни уриб бошлашди. Шу пайтда яна бошқа “Нексиа” ва Тико русумли машиналар кела бошлади. Улар машинадаги плакатларни йиртиб ташладилар. Машинани қолдириб бизнинг машинамиз тарафга қараб сиқа бошладилар. Гўёки бизнинг машинага минишимизни истагандек. Биз машинага ўтирдик.

Акам Бобур: Сизлар кимсизлар қароқчилар, биз қонуний ҳаракат қиляпмиз, пикет ўтказиш учун Қоракўл туман прокуратурасига ариза билан мурожаат қилганмиз, аризани йўқотган бўлсаларинг биз прокурорнинг овозини ёздириб олганмиз деб айтди.

Шу пайт Қоракўл туман ИИБ бошлиғи ўринбосари Алижон Назаров: Машинасидан калитини олмабмиз деб бакирди ва машинага ойнасидан қўлини тиқиб, акам Бобурни бўға бошлади.

Акам Бобур машинани бир амаллаб юритди ва машиналарнинг орасидан Оллохнинг иродаси билан омон эсон чиқиб кетдик.

Биз машинада Қоракўл микрорайонининг ичидан ўтишга харакат қилдик, аммо олдимиздан Али Назаров бошқариб келаётган қизил “Нексиа”чикди.

Кейин биз Қизилқум чўли ичига ора йўллардан кетдик. Алижон Назаров ва Қиличов Ғайратлар бошқараётган машиналар бизнинг орқамиздан тушишди, бирок биз қумли йўлдан йулғунзорлар ичига кириб кетдик. Алижон Назаров бу йўллардан ўтмаган шекилли бизларни йўқотиб қўйди.

Биз айланма йуллар билан ўтиб 13. 30 ларда уйга қайтиб келдик. БиБиСидан телефон қилишди, зўравонлик ҳақида дадам интервю бердилар. Уйда бир неча соат турганимиздан кейин тунги 18 30 лар чамасида онам акам Бобур билан мен ётган уйининг эшигини очиб Бобур қочинглар деб додладию орқага қайтиб кетди.

Биз туриб эшикни очган эдик чиқиб кетишнинг имкони йук эди. Мен ва акам Бобур уйга қайтиб кириб уй ичидаги хоналардан бирига кирдик. Бир неча минутлардан кейин ўқ овози эшитилди. Бирдан электр ўчди, биз қоронғуликдан фойдаланиб тезлик билан югуриб қўшнимизнинг ҳовлисига ўтдик. Қўшнимизнинг Москвич русумли машинасининг остига кириб беркиндик. Машина устидан бир икки маротаба ўқ учиб ўтди. Акам машинанинг остида қолиш хафли эканлигини, портлаши мумкинлигини айтди.

Биз машинанинг остидан чиқиб қўшнимизнинг айвонига ва унинг деразасини очиб пахта даласига чикиб кетдик.

Акам Бобур дадам ва онамни отиб ташлашди шекилли мен қайтиб бораман деб айтди, мен ундан улар қочган бўлса керак, биз қайтиб бориб қўлга тушсак, улар ҳам қайтиб келиб қўлга тушадилар деб айтиб, ёлбориб қочиб кетишга зўрға кўндирдим.

Биз бир танишимизнинг уйига қочиб бордик ва булган гапни айтиб бердик. Шу пайтнинг ўзида дадам ва онамлар хам бошқа бир танишимизнинг уйига қочиб борганлар. Биз уларнинг қаердалигини билгач улар билан учрашдик. Хеч биримиз хаммамизнинг қутулганимизга ишонмасдик. Хаммамизнинг оёкларимиз яланг, усти бошимиз лой эди.

Мен Сизларга 10 декабрь куни бўлган бор вокеани ўзим гувох бўлгандек ёздим.

Каримовнинг буйруғи билан бизни қириб ташлашга қилинган ҳаракат шу тариқа бошланди. Улар ўзларининг жиноятларини яшириш учун энди бизга тухмат қилишятди. Бизнинг уйда итларимиз, молларимиз отиб ташланди. Хамма нарсамиз таланди. Дадам ва икки акамнинг озодлиги Каримов буйруғи билан тортиб олиниб, улар зиндонбанд қилиндилар. Жаллод Каримовга яна нима керак, у яна биздан нима истайди?

Ўз манфаатини ўйлаган дипломатларга ҳам бизга ўхшаганларни Каримовнинг уйдирмаси билан айблаш осон. Каримовни Андижон қирғинини ўтказганлиги учун ҳеч ким айбламай қўйяпти, гўё бўлиши табиий ҳолдек. Ўзини химоя қилиш учун қочиш эса улар назарида жиноятдир.

Мен Каримовнинг дадам ва акаларимга нисбатан уюштираётган видеофилмларини халқаро миқёсда тергов қилинишини талаб қилавераман, албатта Каримов буни инкор қилади. Бу инкори ҳам унинг шармандасини чикариб бизнинг ҳак эканлигимизни исботлаб беради.

Каримов Бизнинг оилани ҳам Андижон халқидек қириб ташламоқчи эди, ҳамон ўз ниятидан қайтмаган.