Lag‘mon — ovqat turi yoki quloqqa osiladigan taom.
Labbay — chaqiriqqa javob yoki shoshganda topilmaydigan so‘z.
Musht — panjalarning tugilgan holati yoki qo‘rqqan oldin ko‘taradigan “yuk”. To‘n — milliy kiyim yoki jahl chiqqanda teskari kiyiladigan libos. Fe’l — so‘z turkumi yoki itning egasiga ma’lum xislati. O‘pka — inson organi yoki hovliqma odamlarda yo‘q a’zo. Yana uzoqdagi quyruqdan yaxshiroq go‘sht. Yong‘oq — quruq meva yoki boshda chaqiladigan mahsulot. Ilon — sudraluvchi yoki yomon gapga po‘st tashlaydigan, yaxshi gapga esa inidan chiqadigan gazanda. Sichqon — kemiruvchi yoki inining bahosi ming tanga turadigan zararkunanda. Echki — uy hayvoni yoki tilab olingan erni tepib o‘ldirgan jonivor. Tarvuz — poliz ekini yoki odamning qo‘ltig‘idan tushib ketadigan mahsulot. Savob — xayrli ish yoki tagi teshik “idish”. Chuchvara — ovqat turi yoki xomligida sanaladigan taom. Hassa — qariyalar suyanadigan tayoq yoki ko‘r bir marta yo‘qotadigan buyum. Qoshiq — oshxona jihozi yoki quruq bo‘lsa og‘izni yirtadigan anjom. Jo‘ja — tovuqning bolasi yoki kuzda sanaladigan parranda. Burga—hasharot yoki ko‘rpaga o‘t qo‘yish sababchisi. Mol — hayvon yoki egasiga o‘xshamasa harom o‘ladigan jonivor. Somsa — taom yoki yemasa ham puli to‘lanadigan ovqat turi. Uzum — meva turi yoki sotilgan bozori surishtirilmasdan tanovul qilinadigan mahsulot. Muhammad TOSHBOLTAYEV