ЖАҲОНГИР МУҲАММАД

Тиригида қадрига етмаймиз, ўлгандан кейин орқасидан йиғлаб юрамиз !

Айниқса, унинг устидан бир неча йил давом этган судлар ва қўшиқчининг баччавозликда айбланиши матбуотнинг асосий “бойлиги”га айланиб қолганди׃
-ёш болакайнинг изиллаб гапириши,
-бачча қилингани айтилган боланинг ота-онасининг таъқибга учраётгани,
-хонандани АҚШда номи ёмонотлиқ қилинган диний ташкилот ўз паноҳига олгани,
-Майкл иқтисодий буҳронга ботгани,
-банклар ундан юз ўгиргани,
-унинг болалар учун қурдирган саройида тинтувлар ўтказилгани,
-бу сарой ёпиб ташлангани,
-пул қолмагани иддао қилинган санъат юлдузининг бир жойни ижарага олиб ойига юз минг доллар тўлаётгани…
Ана шундай фақат салбий гаплар силсиласидан кейин энди бирдан мақтов гап эшитсангиз, табиийки нимадир бўлган, деб ўйлаб қоласиз.

Уйга келиб, телевизорни ёқсам, Фокс ТВ (FoxTV) “Биз унингг ўлганини тасдиқлаймиз!” деб турибди. Си-Эн-Эн(CNN) эса “ Майкл Жексон беҳуш ҳолда касалхонага олиб келинди ва ҳали ўлгани тасдиқланган эмас”, демоқда.

Икки соатлар чамаси бир томон ўлган дейди, иккинчи томон аниқ гап йўқ дейди. Охири ўликларни текширадиган идоранинг вакили “Туш пайтида унинг юраги тўхтаб қолган, шу бўйи ўзига қайтмади, ўлди”, деб баҳсларга нуқта қўйди.
Шундан кейин мақтовлар бошланиб кетди׃
-У дунёниг энг буюк юлдузи эди…
-У поп санъатининг қироли…
-Унда бўлган талант ҳеч кимга насиб этмаган ҳали…
-Унинг билан бир даврда яшаганимдан фахрланаман…
-Дунёда ҳеч бир санъатакорнинг асари уники қадар кўп пул топмаган…
-У болаларнинг улуғ дўсти эди, камбағалларнинг сўзчиси…
-У қора танлиларнинг номини ер куррасининг пешонасига олтин ҳарфлар билан ёзди…
-У ўзи учун эмас, дунё халқлари учун яшади…
Хуллас, бу мақтов мусобақаси ярим тунга қадар давом этди ва бугун яна ҳам авжига чиқди. Бу мусобақада иштирок этмаган санъаткор, сиёсатчи, ҳуқуқшунос, тингловчи қолмади ҳисоб.
Бимадим, негадир менга Майкл Жексонннг қўшиқлари ёқмас эди. Лекин бугун унга жуда ачиндим. Бечора, балки умрининг сўнгги кунлари ана шундай илиқ сўзларга зор бўлгандир? Устидан судлар кетаётган кунлари бир-ҳол, бир аҳволга тушиб суд залига уй кийимида аранг кириб келганида, балки кимдир унинг ҳақида шундай гапни айтишини истагандир? Дунёнинг камбағал болаларига чин юракдан хизмат қилган бу одамни ҳимоя қилайлик дея ҳаракатлар тузилишини орзу қилгандир?!

Эсимда, ўша Майкл Жексон учун жуда оғир бўлган кунлари фақат онаси, синглиси унинг ҳақида илиқ гаплар айтишган ва қолганлар бекордан-бекорга судлар бўладими дегандек мум тишлашганди. Бугун улар телевизорларда, майдонларда кўз ёш тўкишмоқда, Майкл Жексоннинг буюклигидан сўз очишмоқда.

Эллик ёшида юраги бу дунёнинг ваҳшатига дош бермаган Майкл Жексонга бу эътирофларнинг энди бир тийинлик қиймати борми?

Нима бўлганда ҳам бу ҳол менга ўзбек жамияти ҳақида айтган гапларимни эслатди׃ Тиригида қадрига етмаймиз, ўлгандан кейин орқасидан йиғлаб юрамиз… Демак, бу фақат ўзбек жамиятига хос нарса эмас экан!

26-6-2009.