Вафо агар...
Гулнинг янтоқчалик қадри қолмагай,
Бу ҳаёт бошингга нелар солмагай,
Душманинг тулпори чопиб толмагай,
Вафо оёқ ости йўлингда бўлса.
Отлар тиз чўкару итлар ҳураркан,
Номард тилладан тахт уйин қураркан,
Фарзанд отасидан юзни бураркан,
Меҳр чўнтакдаги пулингда бўлса.
Ҳатто нафасингда сувлар музлайди,
Кимлар дўст тутиниб, давлат кўзлайди,
Аввал теринг шилиб, сўнгра тузлайди,
Душманинг ҳам ўнгу сўлингда бўлса.
Қишда саратонда куясан тайин,
Дунёнинг баҳоси — бир пул, бир тийин,
Азоб кучаяди боргани сайин,
Тикан юракдаги гулингда бўлса.
Бўридан қочганни тулки тутади,
Ундан ўтганини итлар ютади,
Бу дунё бир умр ўлжа тутади,
Инсоф қуриб қолган чўлингда бўлса. Ҳасан Саломов.
|