Ўзбекистон халқ ёзувчиси, атоқли
адиб Одил Ёқубов шу йил 21 декабрь куни 83 ёшида вафот этди.
Одил Ёқубов 1926 йилда туғилган. 1944 йилда ўрта
мактабни тугатиб, 1945-1950 йилларда ҳарбий хизматни ўтади. 1951-1956
йилларда Ўрта Осиё давлат университети (ҳозирги Ўзбекистон Миллий
университети) филология факультетида таҳсил олди. Шундан сўнг
Ўзбекистон Ёзувчилар уюшмасида маслаҳатчи, "Литературная газета”нинг
республикамиз бўйича махсус мухбири, "Ўзбекфильм” киностудиясида ва
Кинематография давлат қўмитасида бош муҳаррир, Ғафур Ғулом номидаги
Адабиёт ва санъат нашриётида бош муҳаррир ўринбосари, "Ўзбекистон
адабиёти ва санъати” газетасининг бош муҳаррири, Ёзувчилар уюшмаси
раиси, Вазирлар Маҳкамаси ҳузуридаги Атамашунослик қўмитаси раиси ва
Марказий Осиё халқлари маданияти ассамблеясининг биринчи
вице-президенти лавозимларида хизмат қилди.
Одил Ёқубов катта ва сермазмун ижод йўлини босиб ўтди. Адибнинг биринчи
йирик асари "Тенгдошлар” қиссаси 1951 йилда нашр этилди. Қарийб ярим
асрлик ижодий фаолияти давомида Одил Ёқубов яратган ўнлаб насрий
китоблар, жумладан, "Икки муҳаббат”, "Муқаддас”, "Қанот жуфт бўлади”,
"Биллур қандиллар”, "Излайман” каби қиссалар, "Эр бошига иш тушса”,
"Улуғбек хазинаси”, "Диёнат”, "Оқ қушлар, оппоқ қушлар”, "Адолат
манзили” сингари романлар адабиётимиз хазинасидан муносиб ўрин
эгаллади.
