ОҒОЧ У…

Ватан…
Байроғини байроқ қилган
Қирмизи қондир.
Тупроғини Ватан қилган
Берилган жондир.
Жон бергувчи топилмаса
Ватан Ватан эмасдур.
Тупроқ учун жон бермаса,
Оғоч у-
У, тан эмасдур!

Истанбул, 1995 йил.

ЎЗБЕКНИНГ ҚОЗОНИ

Эрмитажда кўзларимни боғлаган,
Ўз билмаган ўзларимни боғлаган,
Амриқода сўзларимни боғлаган,
Ўзбекнинг қозони.

Оқ мойи не зиғирни ҳам доғлаган,
Муҳожир шоҳ Бобурни ҳам доғлаган,
Юрт танимас зоҳирни ҳам доғлаган,
Ўзбекнинг қозони.

Асрлардир оши тўла қайнаган,
Қўй сўйилса, боши тўла қайнаган,
Ночор кунда тоши тўла қайнаган.
Ўзбекнинг қозони.

Машриқда-ми, Мағрибда ҳам қайнасин,
Тўй-маърака, шарифда ҳам қайнасин,
Нони ярим, ғарибда ҳам қайнасин,
Ўзбекнинг қозони.

Виржиния, 1998 йил.

МАГАР…

Магар сен қафасни севмасанг,
Қафасда сайрайсан не сабаб?
Душманга эврилиб, дўстингга
Қайроқни қайрайсан не сабаб?
Не сабаб ноҳақни ҳақ дейсан,
Манфаат чашмасин кўрганда?
Не сабаб қарз олиб нақд дейсан,
Дардингни майдалаб ўрганда?
Пул бўлса қардошинг бегона,
Минг йиллик андиша бир пулдир.
Меҳр қолиб, зулмни ягона
Тан олган бечора сен-қулдир.
Қуёшга ҳам тортасан парда,
Моҳтобнинг юлдузи ёр дея.
Ҳақ айтилса қиласан зарда,
Зулматнинг кундузи бор дея.
Магар сен адолат қумсасанг,
Эркингни сотасан не сабаб?
Магар сен курашни истасанг,
Туну кун ётасан не сабаб?

Вашингтон, 2003 йил.