ОТАМГА
Ҳали қилич дердим, ҳали от дердим,
Шерлар ҳам олдида бўлар мот дердим,
Кексалик отамга буткул ёт дердим,
Отамнинг сочига оралабди оқ.
Юрагим — жойнамоз, қалбимда — қалам,
Оқ тушар бир куни сочларимга ҳам,
Ҳаттоки, қуёшнинг кўзи бугун нам,
Отамнинг сочига оралабди оқ.
Осмонлар йиғланглар, кунлар йиғланглар,
Зимистонда қўрқиб тунлар, йиғланглар,
Бўғиздан чиқмаган унлар, йиғланглар,
Отамнинг сочига оралабди оқ.
Ҳассага суяниб қолибсан, дунё,
Вафони бозордан олибсан, дунё,
Меҳрни қўйнингга солибсан, дунё,
Отамнинг сочига оралабди оқ.
Дунё афсус экан, дунё — надомат,
Бир нафас ғанимат, кунинг ғанимат,
Менга алам қилар бир нарса фақат,
Отамнинг сочига оралабди оқ. Ҳ.Саломов
|