Кейинги пайтларда Демократик Ўзбекистон Конгресси сайтида эълон қилинаёган айрим мақолаларда ҳақиқатдан кўра ёлғон ва туҳматлар устувор эканлиги кўплар қатори мени ҳам таажжубга солмоқда. Масалан яқинда чиққан "Ўз тилидан тутилган тўти"( www.uzbekcongress.org) (Муаллифи Мирзоулуғ Темиров номли номаълум киши) мақоласида келтирилган айрим маълумотлар қип қизил ёлғон ва ҳамкасбимиз Юсуф Расул ва унинг турмуш ўртоғи Саодат Пўлкановага очиқ туҳматдир.

Муаллиф ёзади:

"Мен эрингизни (Юсуф Расулни демоқчи) Бишкекда кўргандим. Одамлар кунини ўтказолмай юрганда у 1,5-2 минг долларлик компютер олганди. Швецияга келиши билан машина олди. Лекин Швецияда давлат ёрдамини ҳам олмоқда. Яхши бузоқ икки сигирни эмади деганлари шу бўлса керак!"

Бу "далиллар" билан гўёки Мирзоулуғ акамиз Юсуф Расулни МХХдан пул олишига шама қилаяпти. Аслида булар ёлғон гаплар.

Мен Юсуф билан Бишкекда қочқинликда юрганимда бир хонада яшаганман, уни кимдан, қачон ва қандай пул ёки молиявий ёрдам олганини яхши биламан.

Мақола муаллифи иддао қилаётганидек Юсуф Бишкекда компьютер олган эмас. Компютерни мен 1100 долларга олгандим ва ушанда "Узбек-инфо" сайтини очгандик. Мен ҳали ҳам уша компьютерда ишлаяпман. Компютернинг пулини эса "Сорос" жамғармаси томонидан берилган пулга олгандим.

Бир куни "Сорос"нинг Бишкекдаги бўлимида ишловчи Руслан исмлик йигит мени телефон килиб чакирди ва борганимда 1000 доллар пул беришларини айтди. Лекин пулни менга журналистик фаолиятни бошлаб олишим учун ёрдам деб айтганди. Бу пул "Сорос" жамғармаси томонидан молияланган www.tol.sz сайти лойиҳаси буйича, уч журналистга аванс тариқасида берилган қалам ҳақи эди. Мен бу ҳақда кейинчалик Бишкекга биз билан тренинг утказиш учун келган журналистдан билдим. Кейинчалик биз бу лойиҳада ишладик ва берилган авансни "уздик".

Юсуфни Швецияга келибок машина олгани эса бошка масала. Бишкекдалигимизда бизга берилган ёрдам пулларини у тежаб колганди. Швецияга 500 доллар билан келди. Менда эса 50 доллар колганди. Келганларга бу ерда ёрдам пуллари ва мебель олиш учун кредит берилади. Долларда тахминан 3600 доллар бўлади. Олган машинасини эса 8000 кронга олганди. Бу 700 доллар атрофидаги пул. Бунинг учун уни МХХ дан пул олдига чикариб куйиш яхши эмас ахир. Бу бор гап!

Энди мақоладаги иккинчи ёлғонга келсак. Муаллиф Мирзоулуғ Темиров ёзади:
"Бобонгиз осмондан тушган бўлса у ҳақда сиз эмас халқ ўзи айтади айтадиганини. Ҳали бобонгиз ҳақида бир гап айтилмасдан намунча питирлайсиз? Аслида бобонгиз ҳам сиз учун бизнес. Франциядан ўзбек ижодкорлари ҳақида лойиҳа келганда 10 минг долларни олиб ўз бобонгиз ҳақида ёзиб бердингиз. Бу қайси ахлоққа тўғри келади?".

Бу аччиқ гаплар таниқли шоира ва журналист синглимиз Саодат Пўлканова шаънига билдирилган туҳмат ва ҳақоратдан бошқа нарса эмас. Пўлкан шоир ва унинг сулоласи ҳақида қанчадан қанча олимлар, сиёсатчилар ва оддий одамлар илиқ фикрларни ёзишган. Бу адабий сулолани ўзбек адабиётида тутган ўз ўрни бор.

Мени мақоладаги бошқа бир фикр таажжубга солди. Саодатга Франциядан "ўзбек ижодкорлари ҳақида (?) лойиҳа келганда 10 минг долларни олиб бобоси ҳақида ёзиб берган" эмас. Чунки мен бу ишларни бошида тургандим.

Ёдимда бор, Саодатнинг 2004 йилда Францияга бориши ҳам ўз-ўзидан бўлмаганди. Франциядаги бир ташкилотни (номини хаттоки эслай олмайман ҳам) мен топгандим. Аниқроги, улар мени топишди ва Ўзбекистон тарихи ҳақида, ёки эртаклари, этник халклар ижоди ва яна аламбалолар хакида китоб ёзиб берсангиз дейишди. Аммо мен китоб ёза олмаслигимни айтганман ва бу гапни Юсуфга етказдим. Юсуф эса хотинини рукач қилди. Мен бу ишнинг бошланишида орачига ўхшаб қолдим. Саодат эшитишимча бу воқеадан кейин Ўзбекистоннинг энг тарихий шаҳарларидан бири Самарқанддаги қадамжолар ҳақида уч ой изланиб ўзбек ва рус тилларида бир китоб тайёрлади. У бу китобини Франциянинг Марсел шаҳридаги китоблар байрамида намойиш қилиш ва ноширлар билан шартнома имзолаш учун бориши керак эди. У йўл пулига Самарқанддаги бир уйи, ҳамда турмуш ўртоғи Юсуфни машинасини сотишга мажбур бўлди. Сабаби Саодат бу китоби нашр этилишини, Самарқанддаги муқаддас жойлар, қадимий шаҳар тарихи ҳақида француз ўқувчилари билишини чин дилдан истаган эди. Афсуски унинг китоби нашр этилмай қолиб кетди. Мен ўртага тушганим учун жуда хижолат бўлгандим ўшанда.

Бўлган гаплар шулар. Бугун эса Саодатни ва Юсуфни, ҳатто Пўлкан боболарни КГБ (МХХ) агенти деб ёзаётган оғзига кучи етмаган одамлар, гапларингиз қип қизил туҳмат! Майли, МХХ чини фош килинг. Мен ҳам шу тарафдаман. Фақат гапингиз асосли, исботи билан бўлиши керак Мен бу гапларни Юсуфни ёки уни оиласини ҳимоя қилиш учун ёзмаяпман. Мен ўртада бўлиб ўтган мана шу вокеаларга гувоҳ кишиман.

Manba:"Isyonkor".