Наталя Бушуева солиқ тўлашдан бош тортиш ва махсус рухсатсиз журналистик фаолият билан шуғулланганлик айбловлари илгари сурилгандан сўнг Ўзбекистонни тарк этгани айтилади. Айни вақтда "Немис тўлқини"нинг яна бир неча штатсиз мухбирларига нисбатан айни айбловлар тергов жараёни мобайнида тасдиқланганлиги маълум қилинди, лекин уларга нисбатан амнистия қўллангани ҳам билдирилган. Би-би-си "Немис тўлқини" радиосининг Рус хизмати муҳаррири ўринбосари Александр Варкинтин билан боғланиб, Наталя Бушуевага нисбатан эълон қилинган қидирув ҳақида сизларга расман маълум қилишдими, деб сўради.

Александр Варкинтин: Йўқ, бу ҳақда бизга ҳеч нарса маълум эмас. Менга маълум бўлгани, бизнинг Ўзбекистондаги барча ходимларимизга нисбатан тергов ишлари авф туфайли тўхтатилган. Гап шундаки, уларнинг ҳаммасига "Немис тўлқини" билан алоқада бўлиш тақиқланган. Биз уларга зарар етказмаслик учун бу тақиққа қатъий амал қилмокдамиз.

Би-би-си: Сиз уларга нисбатан қўйилган айблар ҳақида нима деб ўйлайсиз?

Александр Варкинтин: Биз ҳам бу айблар ҳақида ахборот агентликлари ва расмий матбуотда пайдо бўлган хабарлар орқали биламиз. Охирги хабарларда уларнинг ўз айбларига тўла иқрор бўлганликлари айтилади. Аммо улар айбларга иқрор бўлишлари мумкин эмас. Чунки расман уларга нисбатан ҳеч қандай айблов эълон қилинмаган.

Би-би-си: Норасмий равишда уларга қандай айблар қўйилгани сизга маълумми?

Александр Варкинтин: Бу ҳақда уларнинг ўзларидан сўраш керак, чунки расман уларга "Немис тўлқини" билан мулоқот қилиш тақиқланган.

Би-би-си: Умуман, Ўзбекистондаги мухбирларингизнинг ҳуқуқий мақомлари қандай? Яъни, улар рўйхатдан ўтишганми?

Александр Варкинтин: Улар бизнинг эркин мухбирларимиз эди. Биз уларни расмий аккредитациядан ўтказиш учун Ташқи ишлар вазирлигига бир неча марта мурожаат этганмиз. Жуда кўп ҳолларда жавоб бериш муддати ўтиб кетган ва уларни рўйхатдан ўтказишмаган, тўғрироғи, бизнинг мурожаатимизни, шунчаки, жавобсиз қолдиришган. Биз яқин кунларда яна бир марта мухбирларимизни рўйхатдан ўтказишни сўраб, мурожаат қилиш ниятидамиз. Аммо шахсан мен ижобий жавоб бўлишини кутаётганим йўқ. Мен факқт шуни айтишим мумкинми, дунёга ўзи ҳақидаги ахборотни мана шундай йўл билан тўсиб қўйишга уринаётган ҳар қандай давлатнинг ташқи оламдан иҳотқланиб қолиш хавфи бор. Ва бундай давлатнинг расмий ахборот воситаларига ишонч бутунлай йўқолади. Ҳозирги глобал дунёда эса, бу ҳеч бир давлат учун яхшилик олиб келмайди.
Манба:Би-Би-Си.