Шу кунларда “Озодлик” радиоси ўз эшиттиришларидан бирида турмуш ўртоғим - Ўзбекистон парламентининг собиқ депутати, ҳозирги кунда сиёсий маҳбус Мурод Жўраев ҳақида хабар тарқатган. Ушбу хабарда “Озодлик” радиоси Мурод Жўраевни “Эрк” партиясининг аъзоси сифатида таърифлаган. Аслида эса Мурод Жўраев Ўзбекистонда биринчилардан бўлиб коммунистик партия аъзолигидан чиққанидан сўнг, ҳеч қачон ҳеч қандай сиёсий партиянинг аъзоси бўлмаган.
У киши барча сиёсий партияларга доимо ҳурмат билан қараган ҳолда ўз сиёсий қарашларини мустақил шахс сифатида изҳор қилиб келганлар. Шу сабабли “Озодлик” радиосидан бундан кейин Мурод Жўраев ҳақида хабар тарқатишидан аввал ҳеч бўлмаса мендан барча тафсилотларни билиб олиб кейин хабар тарқатишларини сўрайман. Ва яна бир бора Мурод Жўраевни “Эрк”партиясининг аъзоси эмаслигини таъкидлайман. Холбека Жўраева, “Бирдамлик” ҳаракати Муборак тумани бўлими раҳбари, Мурод Жўраевнинг рафиқаси.
